كيف نحافظ على الفواكه والخضروات من الفساد سريعاً ؟

الايثلين عبارة عن هرمون نباتي تنتجه فئة كبيرة من النباتات على هيئة غاز. فائدته تكمن في انه يساعد على نضج الثمرة.

شلون؟

هذا الهرمون يحفز خلايا الثمرة على التحلل، فتبدأ تصير أكثر ليونة وأحياناً أكثر حلاوة. وتوجد أنواع من الفواكه أو الخضروات أكثر انتاجاً لهذا الهرمون، بينما فيه أنواع أخرى أكثر حساسية لهذا الهرمون، يعني أنها تتأثر بدرجة كبيرة وتتعرض للنضج أو الفساد بصورة أسرع في وجود هذا الهرمون.

نقدر نستفيد من هذي المعلومة في هدف إطالة عمر الفاكهة وتبطيء عملية نضجها في حال رغبنا في المحافظة عليها من الفساد، أو حتى تسريع عملية النضج لبعض الفواكه اللي تاخذ وقت أطول حتى تنضج.

تعليمات:

-       إذا كنا نبي نحافظ على فاكهة أو خضرة معينة من النضج السريع أو الفساد (خصوصاً إذا كانت حساسة للايثلين)، لازم نخزنها بانفراد بعيد عن منتجات الايثلين

" مٌنتجة للايثلين + حساسة للايثلين = فساد الحساسة بشكل أسرع "

-       أيضا حفظ منتجات الايثلين مع بعضها البعض راح يزيد من فرصة سرعة النضح أو الفساد.

"منتجة للايثلين + منتجة للايثلين = سرعة فساد الاثنين"

 (ولهذا السبب ينصح بعدم تخزين البصل (منتج للايثلين) مع البطاطس (منتج للايثلين) بهدف اطالة عمر الاثنين وعدم تعريضهما للفساد.

-       مٌنتِجات الايثلين من النوع الواحد والموجودين معاً يصبح نضجهم أسرع، لأن انتاج الايثلين يكون متركز، بعكس لو حفظنا كل حبة لوحدها راح يكون تعرضها للايثلين اللي تنتجه أقل.

-       حفظ مٌنتِجات الايثلين بالمكان المغلق أيضاً يسرع من عملية النضج بسبب التركيز العالي لهرمون الايثلين، بعكس لو تركناها بمكان مفتوح، حيث تركيز الايثلين راح يكون أقل.

-       لو كانت معنا موزة غير ناضجة وأردنا تسريع عملية نضجها فبامكاننا اتباع نفس الخطوات اللي كتبتها بالأعلى، بواسطة وضعها مع مجموعة من الموز أو أي فاكهة أخرى مٌنتجة للايثلين في كيس مغلق، راح يكون تركيز الايثلين أعلى وراح تزيد سرعة النضج.

مثال على مٌنتجات الايثلين:

الموز، التفاح، الخوخ، الكمثرى، السفرجل، البصل، الجواف، العنب، الكيوي، المانجو، التين، المانغوستين، الطماطم، البطاطس، الأفوكادو، البابايا، الشمام والتوتيات.

أطعمة مُنتجة للايثلين

مثال على الأطعمة الحساسة للايثلين:

البروكلي، التوت الأسود، أغلب الخضراوات الورقية مثل الخس والجرجير والسبانخ، البطيخ الأحمر، الفراولة، القرع، الباذنجان، البطاطا الحلوة، البازلاء، الهليون، الثوم، الخيار، الجزر، الفطر. 

أطعمة حساسة للايثلين

ملاحظة: اتباع الطرق أعلاه، فقط لو كانت عندنا كمية كبيرة من الفواكه والخضروات ونريد نحتفظ بها لفترة طويلة من الزمن، اما لو كنا راح نستهلكها في خلال أيام معدودة بعد الشراء فما له داعي نتبع هذي الطرق.