ماسكارا طبيعية 100% بمكونات عضوية؟

Organic Wear Mascara - Physicians Formula

بالرغم من إن كثافة رموشي متوسطة إلا إني ما زلت أحب استخدام الماسكرا! ومثل أغلب البنات لو تسألونهم شنو الشي اللي ما تستغنون عنه راح يقولون الماسكرا لأنها تعطي جمال للرموش وتبرز العين وملامحها. ولكن شيء واحد خلاني أكره الماسكرا وأتقزز منها.

قبل فترة مو طويلة، صارت عندي هذي المكبرة، وما خليت شي ما جربت أكبره وأشوفه بالشكل اللي مايبان بالعين المجردة، كنت عشوائيا أبحث عن أشياء أكبرها إلين ما حسيت بفضول أشوف رموشي، وزوجي ساعدني يصور اللي داخل المكبرة عشان ماكنت أقدر أشوفهم بنفسي. وكانت الصدمة!

رموشي بعد تكبيرها بالمكبرة

أعتذر عن بشاعة المنظر ولكن هذا اللي خلاني أترك الماسكرا نهائياً بذيك الفترة، وللعلم! شايفين شلون المنتج متكتل على الرمش ومو معطيه أي فرصة يتنفس واللي صدمني إني كنت منظفة رموشي وماسحة مكياجي قبل هالصورة ولكن لما شفت الصورة تأكدت إني كنت قاعدة أسوي شي غلط طول الأيام اللي فاتت واهو إني ما كنت أنظف رموشي بشكل جيّد، وكنت أخنقهم بهذي المنتجات الخطيرة.

شعرات الرموش بعد تنظيفها بشكل جيد

تدرين انج لما تستخدمين الماسكرا فانتي قاعدة تخنقين رمشج، لانج تغلفينه بمواد متكتلة وتمنعينه يتنفس، والمواد اللي بأغلب الماسكرات هي مواد غير طبيعية تقتل الشعرة وتسبب في تساقطها، وإذا كنت تستخدمين النوع المقاوم للماء فهذي جريمة أكبر بحق رموشج.

تركت استخدامي المعهود للماسكرا لأيام، وبديت أبحث عن بديل لين ما لقيت هذي الماسكرا، Organic Wear من Physicians Formula

قبل ما نتكلم عن خصائص الماسكرا العضوية والطبيعية، شنو تعرفون عن الماسكرا التجارية أو التقليدية؟

الماسكرا التقليدية تحتوي على:

1-    المذيبات الصناعية اللي تمنع الماسكرا نفسها من الجفاف، ولكنها تتسبب بالجفاف والهشاشة لشعرة الرمش.

2-    البوليمرات الاصطناعية اللي تعطي الماسكرا عامل الكثافة والتماسك، وتراكمها على الرموش يعطي ثقل وممكن يؤدي الى تكسرها وبالتالي تساقطها.

3-    المواد الحافظة الاصطناعية مثل الباربينات والمواد البتروكيماوية  اللي تحافظ على المنتجات التجميلية من الفساد أو انتشار وتكاثر البكتيريا، ومثل هذي المواد تاخذ النصيب الأكبر من مسببات الحساسية للعين.

4-    الألياف التركيبية وهي الياف صناعية تستخدم لاعطاء حجم وطول للرموش (فوليوم) وأحيانا تكون مهيّجة للعين وتسبب الحساسية.

5-    أصباغ اصطناعية تستخرج من قطران الفحم وتحتوي على أملاح معدنية ضارة جداً للبشرة، دورها اهو إعطاء الماسكرا اللون الأسود الفاحم.

الماسكرا الطبيعية:

1-    خالية من المذيبات الصناعية، ما تسبب الجفاف للرموش وعلى العكس، فيها مرطبات مثل خلاصة الصبار و الخيار لترطيب الرموش.

2-    بوليمرات طبيعية لاعطاء الكثافة، يستخدم فيها نشاء التابيوكا "Tapioca starch" ومايسبب تكتل المنتج.

3-    مواد حافظة طبيعية ما تسبب الحساسية.

4-    يستخدم بروتين الرز ونشاء التابيوكا لاعطاء حجم أكبر.

5-    يستخدم شمع النحل عشان يساعد في اضافة الطبقات “coating”.

6-    خالية من المواد البترولية، المواد المعدلة وراثياً، الباربينات أو العطور الصناعية.

رأيي وتجربتي مع ماسكرا Organic Wear :

الماسكرا برأيي جداً جميلة أحببتها، تعطي شكل الناتشرال على الرمش، ممكن إضافة أكثر من طبقة بفضل شمع العسل الموجود فيها، خفيفة وماتسبب الحساسية للعين، أحسها ترطب رموشي من غير ما تجففهم أو تكسرهم، والأهم تبقى فترة طويلة من غير ما تسيل طالما العين ما تدمع. سهلة جداً في الازالة، ما احتاج مزيل قوي أو شغل وايد وانا انظف رموشي، يكفي استخدام القطن مع الزيت لاذابة الماسكرا ومسحها وبعدها غسل الوجه بالماء والصابون.

عيبها... كونها ماتحتوي على المذيبات الصناعية الموجودة بأغلب الماسكرات عشان جذي الماسكرات، وبالمقابل تحتوي على الزيوت طبيعية فانها تتأثر بدرجات الحرارة المختلفة، لما تكون في مكان بارد ممكن يكون المنتج ناشف نوعاً ما، ولما تتركينها بمكان دافي أو حار يصير المنتج بالداخل سائل أو أسهل بالاستخدام. فعشان جذي لازم أراعي المكان اللي اتركها فيه قبل استخدامها عشان ما تكون جافة أو جداً سائلة، ما تنفع للي عينهم دايماً تدمع لأنها ممكن تسيل خصوصا انها خفيفة جداً.

إذا كنتي جربتي هذي الماسكرا مسبقاً، أرجو كتابة رأيج فيها بالكومنتات... وشكرا ♥